لندن: لارڈز ٹیسٹ میں پاکستان کی 194 رنز سے شکست کے بعد ٹیسٹ ٹیم کے ہیڈ کوچ سرفراز احمد کے مستقبل پر سوالات اٹھنے لگے ہیں، جبکہ پاکستان کرکٹ بورڈ کی جانب سے ریڈ بال ٹیم کی کوچنگ میں تبدیلی کا امکان ظاہر کیا جا رہا ہے۔
ذرائع کے مطابق وائٹ بال ٹیم کے ہیڈ کوچ مائیک ہیسن کو ٹیسٹ ٹیم کے معاملات بھی دیکھنے کی ذمہ داری دیے جانے کا امکان ہے۔ مائیک ہیسن ابتدائی طور پر ڈائریکٹر ہائی پرفارمنس عاقب جاوید کے ہمراہ لندن پہنچے تھے، تاہم لارڈز ٹیسٹ کے نتیجے کے بعد ان کی ذمہ داریوں میں توسیع کی اطلاعات سامنے آئی ہیں۔
اطلاعات کے مطابق مائیک ہیسن برمنگھم کے ایجبیسٹن کرکٹ گراؤنڈ میں 9 ستمبر سے شروع ہونے والے تیسرے اور آخری ٹیسٹ کے دوران قومی ٹیم کے ساتھ موجود رہیں گے اور ڈریسنگ روم میں بھی ذمہ داریاں ادا کریں گے۔
ذرائع کا کہنا ہے کہ ون ڈے اور ٹی ٹوئنٹی کے بعد مائیک ہیسن کو ٹیسٹ ٹیم کی کوچنگ کی ذمہ داری بھی سونپے جانے کا قوی امکان ہے۔ ایسی صورت میں سرفراز احمد کو انگلینڈ کے دورے کے بعد ریڈ بال ٹیم کی ہیڈ کوچ کی ذمہ داری سے ہٹایا جا سکتا ہے۔
پاکستان کرکٹ بورڈ میں مسلسل تبدیلیوں کے تناظر میں ٹیسٹ ٹیم کی کوچنگ میں ممکنہ ردوبدل کو اہم پیش رفت قرار دیا جا رہا ہے۔
