تہران: ایران کے پاسدارانِ انقلاب نے دعویٰ کیا ہے کہ اس نے شام اور کویت میں امریکی فوجی تنصیبات کو نشانہ بنایا ہے۔ ایرانی حکام کے مطابق، صبح سویرے شام کے علاقے التنف میں قائم امریکی اسپیشل آپریشنز کمانڈ سینٹر پر حملہ کیا گیا، جس کے نتیجے میں امریکی فوج کا ایک ریڈار سسٹم اور خصوصی کارروائیوں میں استعمال ہونے والے متعدد ہیلی کاپٹر تباہ ہوگئے، جبکہ بڑی تعداد میں امریکی فوجیوں کی ہلاکت کا بھی دعویٰ کیا گیا ہے۔
پاسدارانِ انقلاب کے مطابق، کویت میں واقع ایک امریکی فوجی اڈے پر نصب ریڈار سسٹم کو بھی حملے میں تباہ کر دیا گیا۔ تاہم، ان دعوؤں کی آزاد ذرائع سے تصدیق نہیں ہو سکی، جبکہ امریکی حکام کی جانب سے فوری طور پر کوئی باضابطہ ردعمل سامنے نہیں آیا۔
ایرانی حکام کا کہنا ہے کہ آبنائے ہرمز پر ایران کا مکمل کنٹرول برقرار ہے اور جب تک امریکی حملے جاری رہیں گے، اس اہم آبی گزرگاہ کے ذریعے تیل اور گیس کی برآمدات کو روکا جاتا رہے گا۔
دریں اثنا، گزشتہ روز شام میں ایک بڑی کارروائی کے دوران حزب اللہ کے لیے اسمگل کی جانے والی جدید ہتھیاروں کی ایک بڑی کھیپ ضبط کیے جانے کی اطلاعات بھی سامنے آئیں۔ رپورٹس کے مطابق جدید میزائل، ڈرونز اور دیگر اسلحہ عراق سے ایک آئل ٹینکر میں چھپا کر شام کے راستے لبنان منتقل کیا جا رہا تھا، جسے کارروائی کے دوران قبضے میں لے لیا گیا۔
نوٹ: خبر میں شامل حملوں اور جانی نقصان سے متعلق دعوے ایرانی پاسدارانِ انقلاب کی جانب سے کیے گئے ہیں، جن کی آزاد ذرائع سے تصدیق تاحال نہیں ہو سکی ہے۔
