اسلام آباد (11 اکتوبر 2026): نائب وزیراعظم و وزیر خارجہ اسحاق ڈار نے سعودی عرب کے دارالحکومت ریاض کے کنگ خالد انٹرنیشنل ایئرپورٹ پر حوثی حملے پر گہری تشویش کا اظہار کرتے ہوئے اس کی شدید مذمت کی ہے۔

سماجی رابطے کی ویب سائٹ ایکس پر جاری بیان میں اسحاق ڈار نے کہا کہ پاکستان کنگ خالد انٹرنیشنل ایئرپورٹ پر حوثی حملے کی سخت ترین الفاظ میں مذمت کرتا ہے۔ انہوں نے حملے میں زخمی ہونے والے افراد، بالخصوص 6 پاکستانی شہریوں کی جلد صحت یابی کے لیے دعا بھی کی۔

نائب وزیراعظم نے کہا کہ شہریوں اور شہری تنصیبات کو نشانہ بنانا قطعی ناقابل قبول ہے۔ ایسے حملے بین الاقوامی قانون کی خلاف ورزی اور علاقائی امن و سلامتی کے لیے سنگین خطرہ ہیں، لہٰذا ان اقدامات کو فوری طور پر بند ہونا چاہیے۔

اسحاق ڈار کے مطابق پاکستان سعودی حکام سے مسلسل رابطے میں ہے اور صورتحال کا قریب سے جائزہ لے رہا ہے۔ انہوں نے ریاض میں پاکستانی سفارت خانے کو زخمی پاکستانی شہریوں کی معاونت کے لیے ضروری ہدایات بھی جاری کر دی ہیں۔

انہوں نے مزید کہا کہ پاکستان سعودی عرب کی قیادت اور برادر عوام کے ساتھ مکمل یکجہتی کا اظہار کرتا ہے اور دفاعی معاہدے کے تحت سعودی عرب کی سلامتی کے لیے اپنے عزم پر قائم ہے۔