اسلام آباد: کویت کے وزیر خارجہ آج دو روزہ سرکاری دورے پر پاکستان پہنچیں گے، جہاں وہ اعلیٰ سطحی ملاقاتوں اور مذاکرات میں شرکت کریں گے۔ اس دورے کا مقصد دونوں برادر ممالک کے درمیان دوطرفہ تعلقات کو مزید مضبوط بنانا اور مختلف شعبوں میں تعاون کو فروغ دینا ہے۔
ترجمان دفتر خارجہ کے مطابق کویتی وزیر خارجہ اپنے دورۂ پاکستان کے دوران نائب وزیراعظم و وزیر خارجہ اسحاق ڈار سے باضابطہ مذاکرات کریں گے۔ ان مذاکرات میں دوطرفہ تعلقات، باہمی دلچسپی کے علاقائی و بین الاقوامی امور، اور تعاون کے مختلف پہلوؤں پر تفصیلی تبادلہ خیال کیا جائے گا۔
دفتر خارجہ کے مطابق کویتی وزیر خارجہ کی پاکستان کی اعلیٰ سیاسی قیادت سے بھی ملاقاتیں متوقع ہیں، جن میں دونوں ممالک کے درمیان دیرینہ دوستانہ تعلقات، سفارتی روابط اور مختلف شعبوں میں تعاون کو مزید وسعت دینے پر بات چیت کی جائے گی۔
یہ دورہ ایسے وقت میں ہو رہا ہے جب پاکستان اور کویت تجارت، سرمایہ کاری، دفاع اور سفارتی تعاون سمیت متعدد شعبوں میں اپنے تعلقات کو مزید مستحکم بنانے کی کوششوں میں مصروف ہیں۔
